Virkjunarkostir 1. áfanga rammaáætlunar

METin orkugeta í 1. áfanga

Í fyrsta áfanga rammaáætlunar, sem lauk í árslok 2003, var faghópum  falið að meta 35 virkjunarhugmyndir. Orkugeta þeirra samanlagt er um 28 þúsund GWh á ári. Í fjórum tilvikum voru tvær virkjunarleiðir, a og b, metnar fyrir sama orkukost.

Til samanburðar voru einnig metnar 8 virkjunartillögur sem ítarleg gögn eru til um og því var æskilegt að hafa með í samanburði. Orkugeta þeirra er allt að 6,7 þús. GWh á ári. Lengi var að því stefnt að taka einnig til mats í 1. áfanga virkjunarhugmyndir í Hvítá í Árnessýslu og í Hverfisfljóti til þess að samanburður næðist milli allra stærstu orkukosta í jökulám. Vegna takmarkaðra rannsókna á náttúrufari og kostnaðar varð þó að fresta Hvítá til 2. áfanga.  Rannsókn á aðstæðum við Hverfisfljót leiddi í ljós að vegna leka yrði erfitt að finna stað fyrir miðlunarlón. Því var sú hugmynd ekki tekin til mats nú.

Í töflunni að neðan er yfirlit yfir þær virkjanir sem metnar voru í 1. áfanga. Númer framan við nöfn virkjananna eru auðkennisnúmer þeirra. Jarðvarmavirkjunum er þar raðað í landfræðilega röð eftir gosbeltinu frá Reykjanesi í suðvestri til Þeistareykja í norðri en vatnsaflsvirkjunum frá Skagafirði austur um land og suður. (Úr niðurstöðuskýrslu 1. áfanga, bls. 40)

vatnsaflskostir 1. áfanga

Í hægri hluta töflunnar að neðan er að  finna einstaka vatnsaflskosti sem metnir voru í 1. áfanga rammaáætlunar (Viðauki A-1 í niðurstöðuskýrslu 1. áfanga). Með því að smella á millifyrirsögnina að ofan opnast viðauki niðurstöðuskýrslu 1. áfanga þar sem er að finna lýsingar á og kort af hverjum virkjunarkosti. Hverjum kosti í töflunni fylgir blaðsíðunúmer (skáletur innan sviga) sem vísar til blaðsíðunúmers umfjöllunar í viðaukanum. Auk þeirra vatnsaflskosta sem fram koma í töflunni er í viðaukanum að finna lýsingu á virkjunarhugmyndum í Hverfisfljóti (bls. 40) og Djúpá (bls. 42). Þess skal getið að í sumum tilvikum hafa þessar hugmyndir sem lágu til grundvallar mats í 1. áfanga verið endurskoðaðar og þeim breytt. Nýjustu hugmyndir verða kynntar í kaflanum um virkjunarkosti 2. áfanga hér á heimasíðunni þegar þær munu liggja fyrir.

jarðhitakostir 1. áfanga

Í vinstri hluta töflunnar að neðan eru  einstakir jarðhitakosti sem metnir voru í 1. áfanga (Viðauki A-2 í niðurstöðuskýrslu 1. áfanga). Með því að smella á millifyrirsögnina að ofan opnast viðauki niðurstöðuskýrslu 1. áfanga þar sem er að finna lýsingar á og kort af hverjum jarðhitakosti. Hverjum kosti í töflunni fylgir einnig blaðsíðunúmer (skáletur innan sviga) sem vísar til blaðsíðunúmers umfjöllunar í viðaukanum. Þess skal getið að lýsingar á jarðhitakostum eru fremur stuttar og knappar enda upplýsingar um jarðhitasvæðin mun takmarkaðri en raunin var um vatnsaflskosti. Úr þessu verður bætt í 2. áfanga.