Sýn Íslendinga á beislun innlendra orkugjafa hefur breyst. Samstaða hefur verið um virkjun heita vatnsins frá lághitasvæðum til upphitunar og framan af um framleiðslu rafmagns með beislun fallvatna. Uppgangur stóriðju og aukin virkjun fallvatna og háhitasvæða í þeirra þágu hefur kallað fram raddir náttúruverndar, sjálfbærrar þróunar og annarrar nýtingar. Rammaáætlun um nýtingu vatnaafls og jarðvarma er matsferli á virkjunarkostum og náttúrugæðum sem leitar málamiðlunar milli verndar, annarrar nýtingar náttúrugæða og orkuframkvæmda.