ÍTAREFNI VEGNA STARFS FAGHÓPS IV
Raflínulagnir vegna virkjunarkosta
Þegar litið er til nýrra virkjana skiptir tenging þeirra við dreifikerfi verulegu máli. Bæði er um
að ræða verulegan kostnaðarlið og við mat á umhverfisáhrifum er mjög litið til legu raflína.
Faghópur IV áætlaði tengikostnað virkjunarkosta við flutningskerfi raforku eða til
notkunarstaðar með hliðsjón af líklegri lengd háspennulína og þeim tengibúnaði sem til þarf.
Raforkuflutningskerfi landsins er í höndum Landsnets sem ber ábyrgð á lagningu raflína frá
nýjum virkjunum að meginlínum eða beint til stór notenda. Í fæstum tilfellum lágu fyrir
áætlanir um tengingu nýrra orkukosta sem rammaáætlun var með til mats og tillögur um legu
raflína í hverju tilfelli kölluðu á tímafreka og kostnaðarsama undirbúningsvinnu. Landsnet
var því ekki í aðstöðu til leggja fram upplýsingar til að meta tengikostnað virkjunarkosta. Eitt
hlutverk faghóps IV var þó að meta tengikostnað með tilliti til áhrifa á hagkvæmni og einnig
skyldi faghópurinn leggja fram grunnhugmyndir að línustæðum sem aðrir faghópar tóku
afstöðu til. Þar sem ekki lágu fyrir áætlanir um tengingu virkjunarkosta rammaáætlunar hjá
Landsneti varð faghópurinn að setja saman aðferðafræði sem gæfi hugmynd um tengikostnað
og -línustæði. Í töflum 2.2 og 2.3 er tengikostnaður tilgreindur sérstaklega fyrir hverja virkjun
eins og hann var notaður við röðun virkjana innan hagkvæmniflokka.
Aðferðafræði vegna raflínulagna byggðist á eftirfarandi forsendum:
a) Landsnet lét í té upplýsingar um staðsetningu núverandi og áætlaðra tengivirkja. Raflínur frá
nýjum virkjunum liggja á milli tveggja tengivirkja; annað er staðsett í eða við stöðvarhús
virkjunar og hitt á viðtökustað, annað hvort þar sem raforkan sameinast megin
flutningskerfinu eða á notkunarstað.
b) Mæld var bein loftlína frá áætluðum virkjunarstað að því tengivirki sem næst stóð óháð
landsháttum eða náttúrufari að undanskildum augljósum hindrunum, s.s.erfiðu fjalllendi, að
viðbættu 30% fráviki til að gera ráð fyrir líklegum krókaleiðum vegna landshátta, viðkvæmra
svæða og landslagsheilda.
c) Tengikostnaður var síðan reiknaður samkvæmt neðangreindri töflu sem verkfræðistofan
Mannvit setti upp. Í öllum tilfellum miðuðust útreikningar við loftlínur (ekki jarðstrengi).
d) Allir virkjunarkostirnir voru metnir sem sjálfstæðar einingar í hagkvæmnimati tengikostnaðar.
Til framtíðar má hins vegar ætla að klasar virkjana – þ.e. virkjanir sem standa nærri hverri
annarri – muni njóta hagkvæmni með sameiginlegri tengingu við dreifikerfið/notkunarstað.
Af þeim sökum voru lögð fyrir aðra faghópa kort er sýndu samtengda virkjunarklasa með
einni megintengingu við dreifikerfið. Þau vinnukort liggja frammi á vefsíðu rammaáætlunar.
Mat annarra faghópa tók mið af hinni grófu mynd sem faghópur IV dró upp af línustæðum. Í
mörgum tilfellum er augljóst að uppgefin línustæði eru fyrsta tilgáta. Áður en línustæði eru endanlega ákveðin fer fram umfangsmikil rannsóknavinna á vegum Landsnets og fyrirhuguð
línustæði munu ávallt vera gaumgæfð í mati á umhverfisáhrifum og af skipulagsyfirvöldum
sveitarfélaga. Kort sem sýna tilgátur faghóps IV um línustæði má nálgast að neðan. Athugið að á kortunum er huhgsanlegar nýjar línur tálknaðar með bláum línum, gulir hringir tákna virkjunarkosti en rauðir hringir tengivirki.
Vinnusvæði faghóps IV á vef rammaáætlunar
Aðgangur hefur verið opnaður inn á vinnusvæði faghóps IV. Megnið af efninu hefur verið þegar verið fært inn á vef rammaáætlunar.