Í 1. áfanga rammaáætlunar, 1999-2003, var sjónarhornið á orku-nýtingu og áhersla lögð á stærri vatnsaflsvirkjanir, sem flestar byggja á lónum á hálendinu, og á jarðhitavirkjanir nærri byggð.
Metnir voru 20 kostir í 11 vatnsföllum og um 20 kostir á 8 háhita-svæðum. Í árslok 2003 skilaði verkefnastjórn skýrslu þar sem m.a. kom fram að frekari rannsókna á háhitasvæðum væri þörf.
Aðdragandi að verkefni rammaáætlunar er rakinn á undirsíðunni Um rammaáætlun. Fyrsta verkefnisstjórn áætlunarinnar var skipuð vorið 1999.
Verkefnisstjórn til aðstoðar voru faghópar skipaðir sérfræðingum en hlutverk þeirra var að skoða virkjunarkosti hver frá sínum sjónarhóli og gera tillögur til verkefnisstjórnar.
Þegar verkefnisstjórnin hóf störf vorið 1999 setti hún sér það markmið að ljúka 1. áfanga áætlunarinnar í ársbyrjun 2003 með mati og samanburði á 20-25 virkjunarkostum vatnsafls og jarðvarma.
Verkefnisstjórn 1. áfanga skilaði niðurstöðu í árslok 2003 um forgangsröðun virkjunarkosta er byggði á tiltækum gögnum. Enda þótt stjórnin legði mikla vinnu í verkefnið var ljóst að enn meira starf var framundan.
Verkefnisstjórn 1. áfanga viðaði að sér miklum gögnum. Á vegum rammaáætlunar fóru fram margskonar rannsóknir og miklu efni var safnað saman úr ýmsum áttum. Hér er yfirlit yfir helstu gögn sem tiltæk eru á vefrænu formi.
